Deputeti i Partisë Demokratike të Kosovës, Bekim Haxhiu, kërkoi nga Bordi i Radio Televizionit Publik të Kosovës, shkarkimin e menjëhershëm të Rilind Gërvallës, tani i emëruar drejtor i RTK-së.
Gjatë seancës plenare në Kuvend, Haxhiu i bëri thirrje Kurtit të mos e përdorë transmetuesin publik për interesa të Qeverisë së tij.
“E para ka të bëjë me kapjen e RTK-së nga militanti politik dhe financuesi i Lëvizjes Vetëvendosje, Rilind Gërvalla. Emërimi i tij është në kundërshtim me ligjin për RTK-në dhe kërkoj nga bordi i RTK-së ta shkarkojë menjëherë. Po ashtu, i bëj apel kryeministrit që të mos ta përdorë transmetuesin publik për altoparlant të Qeverisë së tij, por të jetë në shërbim të të gjithë qytetarëve”, potencoi Haxhiu para deputetëve.
Njëkohësisht, Haxhiu përmendi edhe disa shqetësime rreth sektorit të shëndetësisë, i cili sipas tij, çdo ditë po shkon drejt degradimit e përkeqësimit, raporton teve1.info.
Madje, deputeti i PDK-së, deklaroi se Qeveria Kurti po mbron ata individë që kanë keqpërdorur mbi 12 milionë në këtë sektor.
“Më lejoni t’i paraqes shqetësimet e mija për sektorin e shëndetësisë e cila çdo ditë po shkon drejt degradimit dhe përkeqësimit. Skandal pas skandali, abuzim pas abuzimi, keqpërdorime e keqmenaxhim, pa dhënë askush llogari për miliona të shpenzuara në shëndetësi. Aferat korruptive tanimë janë shndërruar në normalitet në këtë sektor. Ndëshkohen vetëm ata që kanë abuzuar me nga 200 dhe 300 euro, ndërsa shpërblehen e mbrohen nga Qeveria ata që keqpërdorin mbi 12 milionë euro në sektorin e shëndetësisë.”, shtoi tutje Haxhiu.
Derisa theksoi se nga këto keqpërdorime e abuzime, individë të ndryshëm po avancohen në pozita ende më të larta./teve1.info/.
