Partia Demokratike e Kosovës (PDK) ka dorëzuar një kërkesë në Gjykatën Kushtetuese të Kosovës për vlerësimin e kushtetutshmërisë së katër veprimeve të ndërmarra gjatë seancës konstituive të Kuvendit më 29 qershor dhe në vazhdimet më 1 dhe 3 korrik.
Në komunikatën për media thuhet se kërkesa konteston “kërkesën për propozime për anëtarë të Komisionit për Votim të Fshehtë, hedhjen në votim të këtij komisioni, vetë votimin e komisionit dhe ndërprerjen arbitrare të seancës pas mosmiratimit të Komisionit.”
Sipas PDK-së, të gjitha këto veprime janë në kundërshtim me Kushtetutën e Republikës së Kosovës dhe me aktgjykimin e fundit të Gjykatës Kushtetuese të 26 qershorit, i cili ka krijuar një situatë të re juridike dhe ka përcaktuar qartë rrjedhën që duhet ndjekur për konstituimin e Kuvendit.
Përmes kërkesës ky subjekt politik kërkon nga Gjykata Kushtetuese që ta shpallë antikushtetues votimin e komisionit të fshehtë, vendimin për ndërprerjen e seancës dhe të urdhërojë Kuvendin që të vazhdojë seancën deri në zgjedhjen e kryeparlamentarit me votim të hapur.
“Ky hap është thelbësor për të ndalur tendencën për përmbysje të rendit demokratik dhe për të garantuar që asnjë shumicë e përkohshme parlamentare të mos e vë veten mbi Kushtetutën,” thuhet në njoftimin e PDK-së./teve1.info/
