Shefi i Grupit Parlamentar të PDK-së, Abelard Tahiri kërkoi që kjo pikë të futet në pikën e parë të rendit të ditës dhe të përkrahet nga mazhoranca.
Në të kundërtën, ai deklaroi se nuk do t’i përkrahin marrëveshjet ndërkombëtare që janë në rend dite.
“Si GP i PDK-së, si propozues i komisionit hetimor lidhur me zhvillimet energjetike, i cili është përkrahur nga 40 deputetë. Tashmë kjo është një garanti kushtetuese. Ne kërkojmë që të gjitha GP ta përkrahin këtë mocion procedural, të jetë si pikë e parë e rendit të ditës, sepse nuk kërkon më shumë se 10 minuta të përfundojë ky formalitet dhe pastaj komisioni hetimor ta bëjë punën e tij”, tha ai.
Ndërkaq, shefi i GP të LDK-së, Arben Gashi u shpreh se nëse nuk lejohet formimi i këtij Komisioni atëherë nuk do të marrin pjesë më në votimet në Kuvend.
“Mohimi i kësaj të drejte për ne është përtej çdo limtii, si deputet mund të konkludoj se nëse nuk formohet Komisioni Hetimor parlamentar nuk ka më kuptim që LDK të marrë pjesë në çfarëdo votimi në Kuvend. Nuk ka më kuptim që të votohen marrëveshjet ndërkombëtare nëse i mohohet opozitës të formojë komision hetimor”, tha Gashi.
Sipas tij, s’ka më kuptim parlamentarizmi në Kosovë nëse i mohohet formimi i Komisionit Hetimor.
“Nëse opozitës i mohohet formimi i një komisioni hetues parlamentar nuk ka më kuptim parlamentarizmi. 40 deputetë janë kategori kushtetuese”, tha Gashi.
Po ashtu, ai deklaroi se beson që ka deputetë brenda Lëvizjes Vetëvendosje se do të deklarohen që është gabim moslejimi i formimit të Komisionit Parlamentar.
“Kjo mënyrë e të menduarit është e patolerueshme, besoj se ka njerëz brenda VV-së që kanë me thanë që e keni gabim, unë du me besu që kryetari i Kuvendit që me u rrëzu shtylla kryesore, mbikëqyrja parlamentare. Unë deklaroj, se ne nuk do të votojmë asnjëherë në këtë Kuvend pa u formu Komisioni Hetimor”, shtoi ai./teve1.info/
