Qytetarët në mbarë Kosovën po vazhdojnë të raportojnë raste të dyshuara për shkelje të ligjit përmes aplikacionit “Lajmëro Policinë”, përfshirë edhe kundërvajtjet në komunikacion.
Një rast i tillë është raportuar më 27 gusht 2026 në Drejtorinë Rajonale të Policisë në Prizren, përkatësisht në Stacionin Policor në Suharekë.
Sipas Policisë së Kosovës, përmes aplikacionit është raportuar një automjet që po qarkullonte me shpejtësi prej 155 kilometrash në orë, në një segment rrugor ku shpejtësia e lejuar është 50 km/h. Rasti është regjistruar në rrugën Sopijë–Savrovë, në komunën e Suharekës.
Pas verifikimit të informacionit, më 28 gusht 2026 policia ka arritur ta identifikojë kundërvajtësin, ndaj të cilit është shqiptuar vendimi për kundërvajtje.
Për këtë shkelje, shoferi është dënuar me 500 euro gjobë, pesë pikë negative dhe 12 muaj ndalim të drejtimit të automjetit.
Policia e Kosovës u ka bërë apel të gjithë pjesëmarrësve në komunikacion që të respektojnë rregullat e trafikut, të shmangin shpejtësinë e lartë dhe sjelljet e rrezikshme, me qëllim të ruajtjes së jetës dhe sigurisë së qytetarëve.
