Misioni i OSBE-së në Kosovë ka njoftuar se po e monitoron me vëmendje situatën në vend, pas shpalljes nga Komisioni Qendror i Zgjedhjeve të rezultateve përfundimtare të zgjedhjeve të parakohshme parlamentare të 28 dhjetorit.
KQZ ka miratuar listat përfundimtare të të gjitha partive, përveç asaj të Listës Serbe.
OSBE ka konfirmuar se Lista Serbe ka paraqitur një ankesë në Panelin Zgjedhor për Ankesa dhe Parashtresa dhe tani po pret një përgjigje lidhur me këtë vendim të KQZ-së.
“Misioni thekson nevojën për respektim të plotë të standardeve ndërkombëtare zgjedhore, në veçanti publikimin transparent dhe gjithëpërfshirës të rezultateve zgjedhore, si një mjet për të siguruar siguri juridike dhe trajtim të barabartë për të gjithë garuesit zgjedhorë”, thuhet në reagimin e OSBE-së.
OSBE-ja thotë se “do të vazhdojë t’i monitorojë nga afër zhvillimet”.
