Punëtorët teknik të dhjetë shkollave në Prishtinë, kanë paralajmëruar grevë nga dita e martë, nëse nuk u rriten pagat, raporton teve1.info
Këtë njoftim e bëri kryetari i Sindikatës së Punëtorëve Privat të Kosovës, Jusuf Azemi, përmes një konference për medie.
Azemi tha se nëse nuk rriten pagat, Komuna mos të llogaris në 120 teknikë.
Azemi ka paralajmëruar se greva do të fillojë të martën, nëse këtyre punëtorëve nuk u rritet rroga, të cilën aktualisht e kanë 250 euro.
“Në 10 shkolla punëtorët teknike nuk kanë punuar, pasi që Komuna e Prishtinës ua ka qitë rrogën 300 euro, neto 250 euro. Komuna e Prishtinës ende nuk ka dalë me version zyrtar për ndryshimin e kësaj page. Sot, është marrë vendim që nëse deri të hënën në ora 4 nuk kemi dokument zyrtar për rritjen e pagave, të martën në orën 12:00 do të ulemi dhe nëse kërkesat tona nuk janë të kënaqshme, do të hyjmë në grevë dhe nuk do të kryejmë asnjë shërbim”, tha Azemi.
Ai ka thënë se ky vendim është i prerë.
“E nëse nuk rriten pagat “komuna e Prishtinës të mos llogarisë në mbi 120 punëtorë. E keqja është se po manipulohet me djersën e punëtorëve, për shkak të interesave të njerëzve për përfitime personale. Me 250 euro udhëheqësit tanë shtetërorë nuk i kalojnë as dy ditë. Nëse mbetet kjo pagë që është, Komuna e Prishtinës të mos llogarisë në mbi 120 punëtorë. Është vendim i prerë, ne nuk do të punojmë me këtë pagë. Komuna ka mjaft mjete, sikur mos të kishte pasur, do e kishim kuptuar. Këto mjete në vend që të shkojnë ne pagat e punëtorëve, shkojnë në xhepin e atyre që përfitojnë”, ka thënë Azemi.
