Sezoni aktual nuk po shkon aspak sipas pritshmërive për Dion Kacurin te Baseli. Mesfushori 22-vjeçar, njëherësh pjesë e përfaqësueses U21 të Zvicrës, po përjeton një edicion zhgënjyes me shumë pak hapësira në ekipin e parë.
Deri më tani, Kacuri ka regjistruar vetëm tetë paraqitje me skuadrën e parë. Pas rifillimit të sezonit në pjesën e dytë, ai arriti për një periudhë të shkurtër të fitojë vend në formacionin titullar. Megjithatë, në humbjen 0:2 në udhëtim te Sioni, ai u zëvendësua që në pushimin mes pjesëve — dhe që nga ajo ndeshje nuk ka marrë më minuta në elitë.
Madje, fundjavën e kaluar situata u përkeqësua edhe më tej: Kacuri nuk ishte as në listën e të grumbulluarve për ndeshjen e ekipit të parë, duke zbritur për të luajtur me skuadrën U21 në Promotion League.
Sipas raportimit të ”4-4-2”, lojtari nuk është aspak i kënaqur me situatën e tij aktuale sportive. Interesimi për t’u larguar nga klubi ka ekzistuar që verën e kaluar, por si në afatin kalimtar të verës ashtu edhe në atë të dimrit nuk u gjet një destinacion i përshtatshëm për mesfushorin 22-vjeçar.
Tashmë që merkatoja në Zvicër është mbyllur, një transferim brenda vendit nuk është i mundur në këtë moment. Mbetet e paqartë nëse një lëvizje drejt kampionateve të huaja është në tavolinë. Megjithatë, për një lojtar në këtë moshë, grumbullimi i minutave të rregullta në nivel profesional është jetik për zhvillimin dhe të ardhmen e tij.
Nëse situata nuk ndryshon në javët në vijim, vera mund të sjellë zhvillime të reja për Kacurin — një talent që ka nevojë për besim dhe vazhdimësi për të shfaqur potencialin e tij të plotë.
