Pacolli në Facebook ka thënë se sa ishte në pozitën e nënkryetarit të Prishtinës kishte kërkuar që ky monument të zhvendosej në lagjen Velania të Prishtinës.
Sipas tij, në sheshin i cili mban emrin e komandantit Adem Jashari, do të duhej të ishte shtatorja e tij e jo tre këndëshi i “vëllazërim-bashkimit”.
Postimi i plotë:
JO NGJYROSJE, POR ZHVENDOSJE!
Sa isha në pozitën e nënkryetarit të Prishtinës, në fillim të mandatit në vitin 2018, filloi zbatimi i projektit për rindërtimin e platosë së monumentit që simbolizon vëllazërim-bashkimin!
Kategorik isha kundër realizimit të këtij projekti, meqë ky shesh është i emëruar me emrin e heroit dhe Komandantit legjendar Adem Jashari, dhe si i tillë do duhej të gjendej shtatorja e Komandantit dhe jo tre këndëshi i “vëllazërim-bashkimit”!
Bashkë me shokun tim, ish këshillëtar Komunal z. Rifat Deri, insistuam që i njëjti të zhvendosej në afërsi të lagjes Velania, saktësisht në udhëkryqin e rrugëve Dëshmorët e Marecit dhe 1 Tetori (rruga e Velanisë), pozitë mirë e analizuar, ngase saktë përballë këtijë pozicioni është edhe varreza masive e qindra shqiptarëve të ekzekutuar pas luftës së dytë botërore, sidomos familje fisnike e me zë në Kryeqytet!
Për ti humbur gjurmët e krimit, pikërisht ata që e ideuan obeliskun e “vëllazërim-bashkimit” , ideuan edhe ndërtimin e një trafostacioni energjetik mbi trupat e shqiptarëve të vrarë e të groposur në këtë vend që dikur njihej si “strelishtë”!
Qëllimi ynë ishte që, për nostalgjikët e asaj kohe që filluan të bëjnë bujë kundër kësaj iniciative, kinse për ruajtjen e memories kolektive, të kenë mundësinë e ç’malljes por me një epitaf përkujtimi:
“Ky obelisk u ngrit në emër të vëllazërim-bashkimit, atëherë kur pikërisht përballë tij u ekzekutuan dhe u groposën qindra idealist e patriot shqiptarë, për mos tu gjetur kurrë gjurmët e tyre, ndërtuan mbi trupat e tyre një trafostacion energjetik”!
Andaj duhët zhvendosje, jo ngjyrosje!
