Organizata e Veteranëve të Ushtrisë Çlirimtare të Kosovës ka reaguar ndaj vendimit të Qeverisë së drejtuar nga kryeministri Albin Kurti për zbatimin e ligjeve për të huajt.
Në reagimin e saj, OVL e UÇK-së ka akuzuar kryeministrin Kurti se, sipas tyre, përmes këtij vendimi po krijohen hapësira të reja për veprimtarinë e strukturave ilegale të Serbisë brenda Kosovës.
Veteranët e kanë cilësuar si “skandal politik” deklarimin e Kurtit se strukturat paralele serbe janë shuar, duke thënë se në praktikë po krijohen mekanizma që u japin atyre rol në zbatimin e ligjeve të Kosovës.
Sipas OVL-së, retorika e qeverisë për sovranitet dhe mbrojtje të shtetit ka qenë kryesisht propagandë politike, ndërsa në praktikë, siç thuhet në reagim, Kosova është izoluar nga aleatët e saj dhe po bëhen kompromise për të cilat më parë akuzoheshin qeveritë e tjera.
“Veteranët e UÇK-së nuk do të heshtin përballë politikave të Qeverisë Kurti që relativizojnë sakrificën e luftës çlirimtare dhe që hapin derën për ndikimin e Serbisë brenda institucioneve të Kosovës. Shteti i Kosovës nuk është pronë e asnjë qeverie dhe nuk do të lejojmë që ai të përdoret si instrument propagande për pushtet”, thuhet në komunikatë. /teve1.info/
