Në fjalimin vjetor para deputetëve, Osmani theksoi se veriu i Kosovës vazhdon të jetë sfidë për shkak të pretendimeve territoriale që Serbia ka ndaj Kosovës, përcjell teve1.info
Ajo bëri të ditur se bandat kriminale në veri do të përballen me drejtësi.
“Ne jemi të vendosur si asnjëherë më parë që të krijojmë siguri e sundim të ligjit në çdo cep të territorit tonë. Bandat kriminale nuk do të mund të mbisundojnë dëshirën e qytetarëve tanë edhe atyre në veri, për të jetuar të lirë në atdheun e tyre në Kosovë. Natyrisht që bandave kriminale nuk u pëlqen vendosmëria e institucioneve që të gjithë qytetarët të jenë të barabartë para ligjit… mirëpo le ta kenë të qartë se kjo është rrugë na e cila nuk devijojmë e nga e cila asnjëherë nuk do të heqim dorë. Ata do të përballen me drejtësi për veprat penale kundër rendit kushtetues të Republikës së Kosovës si dhe për frikësimin e kërcënimet që po ua bëjnë qytetarëve tanë”, deklaroi ajo.
Presidentja Osmani falënderoi policët e Kosovës të cilët, siç tha ajo, pavarësisht sfidave po përkujdesen për jetën e të gjithë qytetarëve pa dallim. /Teve1.info/
