Presidentja e Kosovës, Vjosa Osmani, është takuar me kryetarin e Provincës së Kozencës dhe me kryetarët e komunave arbëreshe, ku kanë diskutuar për raportet ekonomike, politike e kulturore mes komunave të Kosovës dhe Kozencës.
Osmani ka thënë se është shumë e rëndësishme që të krijohen mundësi të reja të bashkëpunimit mes bizneseve, institucioneve kulturore dhe operatorëve turistikë.
Presidence e Kosovës ka bërë të ditur se Osmani ka falënderuar për përkushtimin e pashoq për kultivimin e gjuhës, kulturës dhe traditave arbëreshe, si pjesë e rëndësishme e kulturës dhe identitetit shqiptar.
“Ne duam të punojmë së bashku me ju për identifikimin e mundësive për realizimin e projekteve të përbashkëta për ruajtjen, kultivimin dhe përparimin e mëtejmë të traditave tuaja kulturore e gjuhësore”, tha presidentja.
Më tej, Presidentja e shtroi mundësinë e hartimit dhe të realizimit të projekteve për ruajtjen e trashëgimisë gjuhësore e traditave kulturore, nëpërmjet regjistrimit e botimit të kujtesës gojore.
“Rënia e ngadaltë e përdorimit te gjuhës shqipe te brezat e rinj dhe zvogëlimi i popullatës, për shkak migrimit, është sfidë me të cilën ballafaqohen shumë vende, përfshirë edhe rajonet në të cilat jetojnë arbëreshët. Prandaj duhen politika të qarta promovuese”, tha Osmani. /teve1.info/
