Presidentja e Republikës së Kosovës, Vjosa Osmani, është takuar në Uashington me zëvendëssekretarin e Shtetit të Shteteve të Bashkuara të Amerikës, Christopher Landau.
Sipas njoftimit të Presidencës së Kosovës, gjatë takimit presidentja Osmani ka shprehur mirënjohjen e popullit të Kosovës për mbështetjen e vazhdueshme të Shteteve të Bashkuara të Amerikës, përfshirë edhe nënshkrimin nga presidenti Donald Trump të Ligjit për Autorizimin e Mbrojtjes Kombëtare (NDAA), i cili riafirmon mbështetjen amerikane për sovranitetin dhe integritetin territorial të Kosovës.
“Presidentja Osmani shprehu mirënjohjen për mbështetjen e fuqishme të Shteteve të Bashkuara ndaj sovranitetit dhe integritetit territorial të Kosovës, si dhe për vizionin e presidentit Trump që dialogu ndërmjet Kosovës dhe Serbisë të bazohet në njohje reciproke”, thuhet në njoftimin e Presidencës.
Në takim u diskutua edhe për mbështetjen amerikane për anëtarësimin e Kosovës në NATO, si dhe për rritjen e investimeve strategjike ekonomike.
Presidentja Osmani foli po ashtu për zhvillimet e fundit dhe situatën e sigurisë në rajon, duke theksuar rëndësinë e avancimit të Dialogut Strategjik Kosovë–SHBA.
“Dialogu Strategjik Kosovë–SHBA është një platformë thelbësore për forcimin e partneritetit dypalësh dhe për avancimin e bashkëpunimit në fushat me interes të përbashkët”, thuhet më tej në njoftim.
Në këtë takim, presidentja Osmani ka ngritur edhe çështjen e shkeljeve të të drejtave të shqiptarëve në Preshevë, Medvegjë dhe Bujanoc, duke kërkuar përkrahjen e Administratës Trump për adresimin e këtyre shkeljeve.
Sa i përket raporteve ndërmjet Kosovës dhe Serbisë, presidentja ka shprehur mirënjohje për qëndrimin e qartë të Administratës Trump se dialogu duhet të bazohet në njohje reciproke, duke përshëndetur edhe përjashtimin e ideve për ndryshime të kufijve apo ndarje territoriale.
“Kjo qasje është e domosdoshme për ruajtjen e paqes dhe stabilitetit në rajon”, ka theksuar presidentja Osmani.
