Në këtë takim, Osmani ka ritheksuar se Kosova tanimë ka plotësuar të gjitha kriteret për liberalizimin e vizave, teksa ka kërkuar mbështetjen holandeze për këtë çështje.
“Presidentja e Republikës së Kosovës, Vjosa Osmani, gjatë vizitës zyrtare në Çeki është takuar me zv. kryeministrin e Holandës, njëherësh ministër i Jashtëm, Wopke Hoekstra. Temë qendrore e diskutimit në këtë takim ishte procesi i liberalizimit të vizave. Presidentja Osmani ka ritheksuar se Kosova tash e sa kohë i ka plotësuar të gjitha kriteret për liberalizimin e vizave, ndaj në këtë kontekst ka kërkuar mbështetjen holandeze. Presidentja Osmani i ka bërë thirrje Holandës që së bashku me shtetet e tjera anëtare të BE-së të angazhohen që liberalizimi i vizave për Kosovën të marrë epilog gjatë presidencës çeke”.
Ndërkaq, në komunikatën e Presidencës, thuhet se Osmani po ashtu ka kërkuar mbështetje për anëtarësimin e Kosovës në Këshillin e Evropës, Partneritetin në Paqe dhe në NATO.
“Presidentja Osmani ka folur edhe për agjendën evropiane të Republikës së Kosovës, duke rikonfirmuar përkushtimin e institucioneve të vendit për të vazhduar punën në reforma të rëndësishme në të gjitha fushat, e njëkohësisht edhe përgatitjen për aplikim për statusin e kandidatit për anëtarësim në BE. Në takim me zv. kryeministrin Hoekstra, Presidentja Osmani kërkoi mbështetjen holandeze për anëtarësim të Kosovës në Këshillin e Evropës, Partneritetin për Paqe dhe në NATO”.
Pjesë e diskutimit ishin edhe zhvillimet e fundit në rajon dhe Evropë, duke përfshirë këtu edhe marrëdhënien bilaterale në mes të dyja shteteve.
