Presidentja e Kosovës, Vjosa Osmani, ka njoftuar se Ambasada e Kosovës në Bogota të Kolumbisë ka hapur dyert të martën mbrëma.
Nëpërmjet një postimi në Facebook Osmani ka thënë se rritja e prezencës së Kosovës në Amerikën Jugore është me rëndësi strategjike.
“Nga diskutimi e dakordimi me Presidentin e Kolumbisë, Gustavo Petro para saktësisht dy viteve, në një realitet sot në Bogota – Ambasada e Republikës së Kosovës mbrëmë i hapi dyert e saj në mes miqsh e partnerësh. Punë të mira na presin, komunikim i rregullt, si dhe bashkëpunim në dobi të shtetit tonë. Rritja e prezencës së Kosovës në Amerikën Jugore është me rëndësi strategjike. Faleminderit të gjithëve për punën e angazhimin”, ka shkruar ajo.
Ndryshe, Kolumbia e ka njohur Kosovën në gusht të vitit 2008, gjashtë muaj pas shpalljes së pavarësisë./teve1.info/
