Ndërtimi i dy urave të reja mbi lumin Ibër në Mitrovicë është mirëpritur nga qytetarët e Mitrovicës së Veriut. Në një deklarim për emisionin “Ditari” në Teve1, Betim Osmani nga Iniciativa Qytetare në Mitrovicë të Veriut ka thënë se ky projekt është një hap i shumëpritur, i cili i jep fund një periudhe të gjatë izolimi për banorët e kësaj ane.
“Ne si qytetarë e kemi mirëpritur këtë projekt. Më mirë tani se kurrë, sepse tash e 26 vjet na ka munguar komunikimi i lirë,” ka thënë Osmani.
Ai ka kritikuar listat e peticioneve të organizuara nga Lista Serbe, duke theksuar se qytetarët janë të vetëdijshëm për ndikimin e strukturave paralele, të cilat, sipas tij, kanë penguar integrimin e plotë të kësaj pjese të vendit dhe janë marrë me aktivitete të paligjshme si kontrabanda.
“Institucionet duhet të vazhdojnë punën e tyre. Qytetarët e veriut ndihen më të sigurt tani. Për sa kohë shërbimet shëndetësore dhe arsimore kontrollohen nga Serbia, do të ketë gjithmonë probleme, sepse mungojnë të ardhurat,” tha ai, duke shtuar se institucionet e Kosovës duhet ta marrin në dorë sa më shpejt këtë pjesë të vendit.
Osmani theksoi se ndërtimi i një ure shtesë ishte një nevojë e kahmotshme dhe kërkoi që investimet në këtë zonë të mos ndalen, pasi sipas tij, qytetarët kanë nevojë të madhe për zhvillim dhe infrastrukturë moderne.
