Presidentja e Kosovës, Vjosa Osmani, e ka pritur në takim shefin e ri të EULEX-it, Giovanni Pietro Barbano, raporton teve1.info
Sipas komunikatës për medie, Osmani e ka përgëzuar shefin e ri EULEX-it, Giovanni Pietro Barbano, për fillimin e mandatit të tij.
“Në takim me z. Pietro Barbano, Presidentja Osmani theksoi se bashkëpunimi me EULEX-in në suaza të mandatit aktual të këtij misioni dhe me institucionet tjera ligjzbatuese në vend është jashtëzakonisht i rëndësishëm, e në veçanti në këtë periudhë.
Tutje, Presidentja Osmani theksoi se Kosova, si vend që aspiron integrimin në institucionet euroatlantike, është e përkushtuar për koordinim dhe bashkëpunim të vazhdueshëm për të garantuar integritetin profesional dhe zbatimin e praktikave më të mira ndërkombëtare.
Në takim, Presidentja foli po ashtu mbi rëndësinë e bashkëpunimit në fushën e sundimit të ligjit dhe luftimit të krimit të organizuar për tejkalimin e sfidave të sigurisë, si dhe në mbrojtjen e të drejtave të grave, fëmijëve dhe komuniteteve joshumicë”, thuhet në komunikatën për medie.
