Presidentja e Kosovës, Vjosa Osmani, ka pritur në takim përfaqësues të familjarëve të të zhdukurve me dhunë.
Osmani në kuadër të aktiviteteve për shënimin e Ditës Kombëtare të të Zhdukurve me dhunë, priti në takim Bajram Qerkini, drejtor i Qendrës Burimore të Personave të Pagjetur, njëherësh koordinator i Këshillit Koordinues të Asociacioneve familjare të të pagjeturve të Kosovës.
Osmani gjatë takimit theksoi se ndriçimi i fatit të të zhdukurve me dhunë është njëra ndër plagët më të rënda që ka Kosova edhe 25 vite pas luftës.
“Për fat të keq, Serbia akoma vazhdon të mbajë të mbyllura arkivat, përkundër marrëveshjes së Brukselit që e detyron atë t’i hapë ato”, thuhet në njoftimin e Presidencës.
Tutje, thuhet se Osmani riafirmoi angazhimin dhe përpjekjen jo vetëm për zbardhjen e fatit të të zhdukurve me dhunë, por edhe për të vënë në vend drejtësinë./teve1.info/
