Në një adresim për media, Osmani tha se janë në koordinimin me Sekretarin e Përgjithshëm të NATO-s, Jens Stoltenberg për gjithë territorin e Kosovës dhe jo për vende të caktuara.
“Deri tani kam pas disa takime, natyrisht ndër tjerash diskutojmë për ndërveprimin tonë me NATO-n koordinimn dhe sa i përket Republikës së Kosovës koordinimi është i domosdoshëm për tërë territorin dhe jo vetëm për terrritore të caktuara pra çdo cep të Kosovës”, tha ajo.
Po ashtu, Komandantja Supreme tha se FSK-ja vendin e ka në NATO dhe se janë në bisedime me vendet mosnjohëse të Kosovës që ta pranojnë atë së pari në Partneritetin për Paqe e më pas në Aleancën Veriatlantike.
“Mos harroni po ashtu që FSK është ngritur, trajnuar bazuar në standardet e NATO-s dhe natyrisht vendin e ka në këtë organizatë por kjo nuk varet nga Sekretari i Përgjithshëm por nga përkrahja e shteteve anëtare veç e veç. Aty janë 4 shtete që nuk e njohin Kosovën dhe me to jemi duke diskutuar një formulë të caktuar të cilën ato do të mund ta pranonin e cila është përdorur edhe në raste të mëhershme që nuk do të bllokonte Kosovën në Parneritet për Paqe si hap i parë pastaj drejt anëtarësimit në NATO. Pra këto janë diskutimet tona mirëpo koordinimi me NATO-n është i domosdoshëm sepse është në interes të Kosovës”, shtoi ajo./teve1.info/
