Presidentja e vendit, Vjosa Osmani nuk është deklaruar lidhur me arrestimin e sotshëm të tre personave nën dyshimin për keqpërdorim të detyrës zyrtare për rezervat shtetërore.
Në një konferencë për media gjatë vizitës në Komunën e Klinës, Osmani tha se duhet pritur epilogu i këtij rasti, përcjell teve1.info
“Komenti im është që për çdo proces të institucioneve të drejtësisë dhe institucioneve ligjzbatuese, ne duhet ta presim epilogun e rasteve. Dhe, në këtë moment, nga informatat që kemi, është e pamundur të paragjykohet epilogu i këtij rasti. Institucionet e kanë punën e tyre”, u shpreh ajo.
Pas një aksioni disaorësh mëngjesin e sotëm, Policia e Kosovës ka arrestuar Ridvan Muharremin, në lokalin e tij “Bukë e Zemër”.
PK-ja ka zhvilluar një aksion në shtëpinë dhe lokalin e Muharremit, njeriut që në disa përgjime përmendet rreth sigurimit të rezervave shtetërore.
Bastisje ka pasur edhe te Ministria e Tregtisë, ku sipas raportimeve janë arrestuar dy zyrtarë të MINT-it, Hafiz Gara dhe Irfan Lipovica, nën dyshime për dallavere me rezervat shtetërore.
Rreth këtij aksioni kanë dhënë detaje edhe nga Prokuroria Speciale, të cilët kanë bërë të ditur se tre të arrestuarit dyshohen për veprat “Keqpërdorim i detyrës zyrtare”, si dhe “Dhënie të ndihmës në kryerjen e veprës penale të Keqpërdorimit të detyrës zyrtare”.
Të njëjtit janë dërguar në mbajtje për 48 orë. /Teve1.info/
