Presidentja e Kosovës, Vjosa Osmani, është deklaruar sot para mediave në lidhje me përmbylljen e procesit të konstituimit të Kuvendit të Kosovës dhe hapat e ardhshëm drejt formimit të Qeverisë së re.
Osmani tha se Kuvendi tashmë është plotësisht funksional, duke e cilësuar këtë si një hap të rëndësishëm për stabilitetin institucional të vendit.
“Përkundër përpjekjeve të mia të vazhdueshme që Kuvendi të konstituohet sa më shpejt, ky proces ka qenë tërësisht në duart e partive politike dhe të deputetëve. Megjithatë, tani ai është përmbyllur me sukses – Kosova ka Kuvend të konstituuar,” deklaroi Presidentja.
Pas këtij zhvillimi, Osmani tha se ka mandatuar Albin Kurtin si kandidatin e propozuar nga partia fituese e zgjedhjeve për të formuar Qeverinë e re.
“Që nga momenti i nominimit, kandidati ka në dispozicion 15 ditë për të propozuar kabinetin qeveritar. Negociatat për formimin e koalicioneve janë çështje e brendshme e partive politike, por shpresoj që ky proces të përmbyllet sa më shpejt”, shtoi ajo.
Presidentja theksoi rëndësinë e krijimit të një Qeverie me mandat të plotë, e cila do të mund të adresojë me efikasitet sfidat dhe prioritetet që ka vendi në këtë periudhë.
