Duke folur për takimin e 18 marsit në Ohër, presidentja e vendit, Vjosa Osmani bën të ditur se nuk pret shumë nga ana e Serbisë. Megjithatë ajo thotë se ka shpresa në komunitetin ndërkombëtar.
Sipasa saj, në takimin e së shtunës Kosova do të angazhohet më shumë, ku do të jap komentet dhe propozimet e veta, përcjell teve1.info
Osmani potencoi se gjysma e marrëveshjeve nuk janë zbatuar nga ana e Serbisë.
“Deri tani më shumë se gjysma e marrëveshjeve nuk janë duke u zbatuar nga ana e Serbisë. Nuk kemi pritje të mëdha nga ana e Serbisë, shpresa ime është që komuniteti ndërkombëtar do të fokusohet me një presion në raport me Serbinë në mënyrë që të bindet Serbia që data 18 mars në Ohër është një momentum i rëndësishëm në procesin e dialogut, që do të zgjidhen shumë çështje të cilat pastaj e hapin rrugën drejt njohjes reciproke”, deklaroi ajo.
Osmani shtoi se presidenti serb, Aleksandar Vuçiq ka dhënë sinjale që nuk ka ndryshuar qëndrim.
“Këto pritje janë pritje që varen nga ne. Unë nuk mund të tregoj se si mund të sillet Serbia sepse deri sot ata nuk kanë dhënë ndonjë një kontribut, qoftë për arritje të marrëveshjes, qoftë për stabilitet e paqe në rajon. Presidenti Serb jep sinjale që ata nuk ka ndryshuar dhe nuk e kanë ndërmend të ndryshojnë, kontributi i tyre i vetëm në proces ka qenë obstruksioni dhe kjo nuk është as gjë e re, kjo ka ngjarë në këto 12 vite të dialogut”, tha ajo.
Presidentja Osmani po ashtu komentoi dhe 15 modelet evropiane të prezantuara, të cilat siç thotë ajo, s’kanë të bëjnë me Asociacione.
Sipas saj, janë analizuar të gjitha dhe modeli më i mirë është ai që ka aktualisht Kosova.
“Sa i përket modeleve evropiane që janë prezantuar, të 15-at s’kanë të bëjnë me asociacione. Janë modele të drejtash për pakicat. Në disa jepen më shumë të drejta, e në disa më pak sesa që tashmë u jep Kosova komuniteteve joshumicë. I kemi analizuar të gjitha dhe ka elemente që mund të merren prej secilës prej tyre, por do të thosha që modeli më i mirë, shumë më i mirë se të gjitha ato 15, është ai që ka aktualisht Kosova. Jemi për të diskutuar elemente të tilla, në mënyrë që në Kosovë të kemi gjithëpërfshirje, diversitet e multietniciteti të jetë vlera jonë kushtetuese”, ka thënë Osmani, duke shtuar se Kosova “refuzon diçka që rrezikon mënyrën e funksionimit të sistemit tonë demokratik”. /Teve1.info/
