Presidentja e Kosovës, Vjosa Osmani, ka realizuar takim sot me ministren e Punëve të Jashtme të Finlandës, njëkohësisht kryesuese të OSBE-së, Elina Valtonen.
Zyra e Presidencës ka njoftuar se gjatë takimit është diskutuar mbi zhvillimet e fundit që kanë ndodhur në Kosovës, si dhe për stabilitetin dhe zbatimin e rendit e ligjit.
“Presidentja Osmani ritheksoi përkushtimin e Kosovës për bashkëpunim të ngushtë me OSBE-në në procesin e reformave, transparencës institucionale dhe të drejtave të njeriut.
Në këtë kontekst, Presidentja Osmani theksoi se pret që OSBE-ja do të vazhdojë t`i mbështesë prioritetet kyçe të Kosovës, përfshirë barazinë gjinore dhe fuqizimin e të drejtave të njeriut”, thuhet në njoftim.
Ndërkohë edhe u bë e ditur që presidentja falënderoi Finlandën për mbështetjen e vazhdueshme ndaj Kosovës, veçanërisht në proceset e shtetndërtimit, demokratizimit dhe forcimit të institucioneve./teve1.info/
