Presidentja e Kosovës, Vjosa Osmani, ka shprehur ngushëllime për ndarjen nga jeta të ish-kryeministrit në ekzil, Bujar Bukoshi, një figurë e njohur e historisë politike dhe mjekësisë kosovare.
Në mesazhin e saj drejtuar familjes Bukoshi, presidentja Osmani vlerësoi lart kontributin e Bukoshit në periudhat më të vështira për popullin e Kosovës, duke e cilësuar atë si një “mjek me vizion dhe një burrë shteti me përkushtim të pashoq”.
“Dr. Bukoshi do të kujtohet përherë për kontributin e tij për fuqizimin e kauzës së Kosovës së lirë e të pavarur”, thuhet në mesazhin e presidentes.
Ajo theksoi se puna e tij si mjek, intelektual dhe udhëheqës politik ka lënë gjurmë të pashlyeshme në rrugën drejt lirisë dhe pavarësisë, ndërsa i shprehu mbështetjen dhe ngushëllimet më të sinqerta familjes Bukoshi.
“Bashkëndjej me ju dhe ju inkurajoj që të gjeni forcë në përballimin e dhimbjes. I përhershëm qoftë kujtimi për Dr. Bujar Bukoshin,” përfundoi presidentja Osmani.
