Presidentja e Kosovës, Vjosa Osmani ka thënë se situata si pasojë e vërshimeve kërkon kujdes maksimal duke u bërë thirrje qytetarëve për vigjilencë dhe respektim të udhëzimeve nga institucionet kompetente.
Ajo ka shprehur mirënjohje për gjitha institucionet dhe qytetarët për reagim me përgjegjësi ndaj situatës së krijuar.
Osmani në një postim në Facebook ka thënë se ka qenë në kontakt me kryetarët e komunave të prekura nga vërshimet, duke shtuar se FSK është në gadishmëri
“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore. Agjencia për Menaxhimin e Emergjencave po punon pareshtur bashkë me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja. Situata kërkon kujdes maksimal. U bëj thirrje qytetarëve të tregojnë vigjilencë dhe të respektojnë me përpikëri udhëzimet e institucioneve kompetente. Bashkëpunimi i ngushtë dhe reagimi profesional mbeten vendimtare për përballimin me sukses të kësaj situate”, ka shkruar Osmani.
