Presidentja e Kosovës, Vjosa Osmani ka njoftuar se sot ka dorëzuar në Gjykatën Kushtetuese kërkesë për shqyrtim të konfliktit të kompetencave kushtetuese të krijuara nga mungesa e konstituimit të Kuvendit.
Sipas Osmanit, kërkesa është paraqitur pas një situate të paprecedent në jetën institucionale të vendit dhe për qëllim ka qartësimin e pasojave juridike të moskonstituimit të Kuvendit brenda afatit kushtetues prej 30 ditësh.
“Sot në përmbushje të përgjegjësisë sime kushtetuese, për të garantuar funksionimin demokratik dhe kushtetues të vendit kam paraqitur kërkesë në Gjykatën Kushtetuese për të shqyrtuar konfliktin e kompetencave kushtetuese të krijuar nga mungesa e konstituimit të Kuvendit të Kosovës. Kjo është një kërkesë që paraqitet pas një situate të paprecedent në jetën institucionale të vendit tonë, ku përkundër aktgjykimit të Gjykatës Kushtetuese i cili ka paraqitur afatin kushtetues të detyrueshëm kanë mbetur vetëm pak ditë, mirëpo nuk shihet në horizont as konsensusi e as kompromisi për konstituimin Kuvendit brenda këtij afati kushtetues. Duke qenë se çdo afat i detyrueshëm kushtetues dhe çdo moszbatim i aktgjykimeve të Gjykatës Kushtetuese duhet të ketë edhe pasoja juridike, por ato nuk janë sqaruar në aktgjykimin paraprak kërkesa jonë sot në esencë është kërkesë për qartësimin e pasojave juridike të moskonstituimit të Kuvendit brenda afatit kushtetues prej 30 ditësh”, ka deklaruar Osmani një një konferencë për media të martën pasdite.
Më tej, ajo ka bërë të ditur se kërkesa ka karakter preventiv që bëhet për shkak të mbrojtjes së rendit kushtetues të vendit nga pasojat e pariparueshme.
Gjithashtu, Osmani, ka theksuar se kërkesa nuk e paragjykon epilogun në vazhdimin e afatit të mbetur prej katër ditësh për konstituimin e Kuvendit, pasi në rast të konstituimit të tij, ajo mund të tërhiqet.
“Kërkesa e dërguar në Kushtetuese nuk e paragjykon epilogun në vazhdimin e afatit të mbetur prej katër ditësh për konstituimin e Kuvendit, pra në rast se ka ndonjë sukses në konstituimin e Kuvendit brenda pak ditësh ne mund ta tërheqim kërkesën edhe pse qartësitë për çështjet që i kemi ngritur në këtë kërkesë ne besojmë se janë esenciale jo vetëm për këtë legjislaturë por edhe për legjislaturat e ardhshme. Qëllimi është që të qartësohet situata lidhur me moskonstituimin e Kuvendit brenda afatit 30 ditor dhe të sqarohet sesi ushtrohen kompetencat e secilit institucion kushtetues në mungesë të konstituimit të një prej shtyllave kryesore të parimit të ndarjes së pushteteve që është Kuvendi i Kosovës. Po ashtu duhet të sqarohet se çfarë ndodh në rast se Kuvendi konstituohet pas 26 korrikut”, ka theksuar ajo.
