Ajo tha se të drejtat e grave në shumë vende të botës po cenohen, andaj bëri thirrje për më shumë paqe dhe siguri.
Osmani tha se para 20 viteve gratë në botë patën një synim, kur edhe themeluan Rezolutën 12-25. Sipas Osmanit, atëherë kishte një moment global kur bota kuptoi që të flitet për paqen dhe të vendoset për paqen zërat e grave janë më se të nevojshëm.
“Por më e rëndësishmja, duhet me qenë e qartë për te gjithë se nëse dëshirojmë të ndërtojmë paqen mund të bëjmë vetëm nëse gratë janë të ulura në tavolinat vendimmarrëse”, tha Osmani.
Ajo shtoi se në disa vende të botës shihet kur të drejtat e grave jo vetëm që keqpërdoren por sipas saj këto të drejta po sfidohen edhe në demokraci nga ngritja e rasteve të dhunës në familje deri te gratë që gurëzohen për vdekje vetëm pse kërkojnë respekt për të drejtat themelore”, tha Osmani.
Osmani tha se në hapje të këtij Forumi ishte e ftuar ish sekretarja amerikane e shtetit, Madeline Albrite, e cila ndërroi jetë muaj më parë e që sipas Osmanit ishte një zë për paqe dhe të drejta elementare në Kosovë vite më parë.
Kurse kryeministri, Albin Kurti i cili mori pjesë në hapje të këtij forumi, tha se siguria nuk është vetëm një temë por sipas tij në Kosovë siguria për gratë është një mision.
“Nuk ka pas ndonjë fazë ku gratë nuk kanë qenë të përfshira në siguri dhe paqe dhe angazhimi i grave në Kosovë nuk ka munguar në shtetndërtim dhe mbarëvajtjen e shtetit tonë. Ato kanë armë të ndryshme në dorë me një qëllim të vetëm për paqe dhe paqe për të gjithë, për vetën, për kombin dhe për të ardhmen”, tha Kurti.
Ai shtoi e pjesëmarrja e grave në institucionet e sigurisë është frymëzim për çdo vajzë që t’i hyjë kësaj rruge me kurajo.
Kurti tha se numri i vajzave që shërbejnë në FKS është i lartë por duhet të rritet ende. Sipas tij nuk ka garancion më të mirë për paqe dhe siguri përveç nëse kjo bëhet nga gra e burra bashkë.
Në hapje të këtij forumi, të pranishmit i përshëndeti edhe Sekretari amerikan i shtetit, Anthony Blinken dhe kryetarja e Parlamentit Evropian, Roberta Metsola.
Sekretari Blinken tha se Forumi i organizuar nga Presidentja Osmani bashkon dy gjëra që i kishte shumë për zemër Sekretarja Madeleine Albright: popullin e Kosovës dhe fuqizimin e grave.
Sipas tij, sekretarja Albright luftoi për angazhimin e grave në të gjitha aspektet e ndërtimit të paqes dhe vendimmarrjes së sigurisë, pjesërisht sepse ajo kishte parë ndryshimin që ndodhte kur atyre u jepej një zë.
Albright ka inkurajuar edhe gratë kosovare, kur më 2005 kishte thënë se e ardhmja e vendit do të varet – në një masë jo të vogël -nga mundësitë që do t`u ofrohen grave të vendit.
“A do t’u jepet atyre një shans i barabartë për të shkëlqyer në klasë, për të pasur sukses në vendin e punës, për të ndjekur ëndrrat e tyre në çfarëdo fushe të angazhimit që mund të zgjedhin – të bëhen biznespersona ose mjekë, gazetare, programuese kompjuteri, madje në të ardhmen edhe presidente e kryeministre të Kosovës”, ka cituar Blinken, duke potencuar se që nga ajo kohë, Kosova ka votuar dy gra presidente, respektivisht dy më shumë se Shtetet e Bashkuara.
Forumi Për Gratë, Paqe dhe Siguri i filluar të shtunën pritet të zgjasë tri ditë dhe do të marrin pjesë rreth 400 pjesëmarrës nga e mbarë bota.
