OKB-ja u përmbajt të mërkurën nga komentimi i drejtpërdrejtë i propozimit të presidentit amerikan Donald Trump për të “marrë Rripin e Gazës” dhe zhvendosjen e palestinezëve, por argumentoi se zhvendosja e detyruar është “spastrim etnik”.
Zëdhënësi i OKB-së Stephane Dujarric u pyet gjatë një konference për shtyp nëse Sekretari i Përgjithshëm i OKB-së Antonio Guterres “beson” se plani i Trump është spastrim etnik. Ai tha: “Çdo zhvendosje e detyruar e njerëzve është e barabartë me spastrim etnik”.
Ndërsa Dujarric shmangu të bënte një deklaratë të drejtpërdrejtë mbi planin e Trump për Gazën, ai njoftoi se Guterres do të flasë në një takim të organizuar të mërkurën nga Komiteti i OKB-së për Ushtrimin e të Drejtave të Pamohueshme të Popullit Palestinez (CEIRPP), raporton AA.
“SHBA do të marrë përsipër Rripin e Gazës”, tha Trump në një konferencë shtypi të martën në mbrëmje së bashku me kryeministrin izraelit Benjamin Netanyahu.
Ai përsëriti se popullsia e Gazës duhet të zhvendoset në vende si Jordania dhe Egjipti, me ShBA që ta kthejnë tokën në “Rivierën e Lindjes së Mesme”.
