Rinia Demokratike e Kosovës (RDK) ka zhvilluar sonte një aksion simbolik para ndërtesës së Qeverisë së Kosovës, duke vendosur batanie e qirnj para objektit. Ky aksion nga rinia e PDK-së u cilësua si një protestë për të ngritur zërin lidhur me krizën energjetike, faturat e rrymës dhe vështirësitë ekonomike me të cilat po përballen qytetarët.
Sekretari i RDK-së, Altin Gjata, theksoi se ky aksion nuk ka të bëjë me statistika apo propagandë, por me realitetin e përditshëm të qytetarëve të Kosovës.
Gjata shtoi se kriza energjetike dhe faturat gjithnjë e më të papërballueshme po i detyrojnë familjet kosovare të zgjedhin mes ngrohjes dhe ushqimit, ndërsa studentët detyrohen të mësojnë në terr.
Sipas tij, pyetja që sot shtrohet nga qytetarët është e thjeshtë dhe e drejtë: edhe sa do të rritet çmimi i energjisë elektrike?
“Jemi këtu para qeverisë, jo për statistika, jo për propagandë, po për ta ngritur zërin për vështirësitë që po i përjetojmë çdo ditë. Jemi këtu për krizën energjetike dhe për faturat që po bëhen të papërballueshme për familjet tona. Jemi këtu për prindërit tanë që po u duhet të zgjedhin në mes ngrohjes dhe ushqimit. Për studentët që mësojnë në terr dhe për qytetarët që me plot të drejtë pyesin edhe sa, edhe sa do të rritet çmimi i faturave të rrymës. Albin Kurti po tallet me qytetarët duke u thënë se po ngrohemi më shumë se ç’duhet. Por sot po e pyesim publikisht, kush po e shpërdoron energjinë? Qytetari që me zor ia del deri në fund të muajit apo?”, tha ai.
Gjata kritikoi Qeverinë për bllokimin e qindra milionë eurove investime në energji të pastër dhe për dështimin në sigurimin e prodhimit vendor të mjaftueshëm, duke theksuar se kjo nuk është krizë dimri, por krizë menaxhimi dhe papërgjegjësie, shkruan KP.
Gjata po ashtu shtoi se, ndonëse u premtua modernizim historik i KEK-ut, sot ky institucion prodhon më pak, importet janë rritur dhe përfitimet po shkojnë tek të preferuarit e pushtetit.
Rinia e PDK-së proteston para Qeverisë kundër ngritjes së çmimit të energjisë
