Sekretari i Përgjithshëm i OKB-së António Guterres e ka mirëpritur marrëveshjen që synon normalizimin e marrëdhënieve midis Kosovës dhe Serbisë. Kështu thuhet në një deklaratë të lëshuar nga shërbimi për shtyp i kreut të Kombeve të Bashkuara të hënën.
“Sekretari i Përgjithshëm mirëpret marrëveshjet e palëve për zbatimin e Marrëveshjes për rrugën e normalizimit të marrëdhënieve ndërmjet Beogradit dhe Prishtinës, të shpallura së fundmi nga Bashkimi Evropian”, thuhet në deklaratë, transmeton teve1.info.
Kreu i OKB-së e konsideron të rëndësishme që të dyja palët të respektojnë menjëherë dhe plotësisht të gjitha detyrimet e marra nga kjo marrëveshje. António Guterres thekson se një qasje e tillë është në interes të të gjitha palëve.
“Kombet e Bashkuara mbeten të përkushtuara për të mbështetur zbatimin e marrëveshjeve që dalin nga dialogu ndërmjet Beogradit dhe Prishtinës, të lehtësuar nga BE-ja”, thuhet në deklaratë.
