OKB ka raportuar se 127 civilë janë vrarë nga sulmet izraelite në Liban që nga nënshkrimi i një armëpushimi, duke bërë thirrje për investigim të paanshëm.
“Vazhdojmë të jemi dëshmitarë të sulmeve në rritje nga ushtria izraelite, që rezultojnë në vrasjen e civilëve dhe shkatërrimin e objekteve civile në Liban , të shoqëruara me kërcënime alarmuese për një ofensivë më të gjerë dhe të intensifikuar”, tha Thameen Al-Kheetan, një zëdhënës i zyrës së OKB-së për të drejtat e njeriut, në një konferencë për shtyp në Gjenevë.
Edhe Libani ka akuzuar Izraelin për shkelje të armëpushimit, i cili parashihej t’i jepte fund konfliktit me grupin ushtarak libanez Hezbollah, duke vazhduar sulmet dhe duke mbajtur forcat përbrenda territorit libanez prej nga marrëveshja e parashihte të tërhiqeshin.
Sipas ministrisë së shëndetësisë libaneze, më shumë se 330 persona janë vrarë dhe 945 të plagosur që kur armëpushimi hyri në fuqi më 27 nëntor të vitit të kaluar.
Kheetan tha se OKB-ja kishte verifikuar se të paktën 127 civilë u vranë në atë periudhë, citon Guardian.
Ai theksoi në veçanti sulmin izraelit të javës së kaluar në kampin Ain al-Hilëeh për refugjatët palestinezë në Libanin jugor, i cili vrau 13 persona – 11 prej tyre fëmijë.
Ai shtoi: “Duhet të ketë hetime të shpejta dhe të paanshme për sulmin në Ain al-Hilëeh, si dhe për të gjitha incidentet e tjera që përfshijnë shkelje të mundshme të ligjit ndërkombëtar humanitar nga të gjitha palët, si para ashtu edhe pas armëpushimit.”
“Përgjegjësit duhet të nxirren para drejtësisë.”
Kheetan tha se sulmet e vazhdueshme izraelite në Liban kishin shkatërruar dhe dëmtuar infrastrukturën civile.
