Takimi i parë mes Odës Ekonomike të Serbisë dhe Kosovës për tejkalimin e barrierave administrative në bashkëpunimin ekonomik do të mbahet të enjten, më 30 mars, në Shkup, njoftoi Oda Ekonomike e Maqedonisë së Veriut (PKSM).
“Takimi do të zhvillohet në dinamikën e vendosur për të zgjidhur sa më shpejt të gjitha çështjet kontestuese që kanë të bëjnë me barrierat administrative që pengojnë bashkëpunimin ekonomik ndërmjet Serbisë dhe Kosovës”, thuhet në një njoftim.
Në njoftim tutje thuhet se pajtimi për çështjet kontestuese në bashkëpunimin tregtar është një element që mund të çojë në normalizimin e marrëdhënieve mes vendeve.
“Tashmë ka marrëveshje të nënshkruara që duhet të ofrojnë bazën dhe instrumentet për përmirësimin e ndjeshëm të konkurrueshmërisë, kohezionit ekonomik dhe lidhshmërisë së të gjithë Ballkanit Perëndimor”, thuhet tutje në njoftim.
“Prandaj fillimisht është e nevojshme që të hiqen të gjitha barrierat administrative dhe të krijohen kushte për përmirësimin e bashkëpunimit ekonomik nëse duam që partnerët e huaj dhe institucionet ndërkombëtare ta shohin rajonin si një partner të ardhshëm politik dhe ekonomik të begatë”, njofton Oda Ekonomike e Maqedonisë së Veriut, transmeton teve1.info.
