Në minutën e 77-të, më në fund, erdhi koha e Guillermo Ochoas.
Tifozët kishin brohoritur për portierin legjendar ndërsa ai doli në fushë për ngrohje. Ata bërtitën “Memo” – nofka e Ochoas – përpara se të paraqiteshin emrat e lojtarëve në stadium përpara ndeshjes së fundit të Meksikës në fazën e grupeve të Kupës së Botës kundër Çekisë. Thirrjet “Ochoa” u dëgjuan në të gjithë stadiumin “Estadio Azteca” në minutën e 73-të.
Përzgjedhësi Javier Aguirre gëzoi shikuesit duke e aktivizuar veteranin 40-vjeçar nën duartrokitje të zjarrta në një ndeshje që me shumë gjasa shënon lamtumirën e tij.
“Është gjëja më e bukur që ata e njohin kontributin tënd”, tha Ochoa për tifozët pas fitores 3:0 të Meksikës. “Gjithmonë përpiqem ta bëj për ta, të lë gjurmë. Mendoj se sot ishte një mbyllje e përkryer”.
Ambienti për lamtumirën e tij nuk mund të kishte qenë më i mirë se në stadiumin “Azteca”, ku ai bëri debutimin e tij profesional me Club America në vitin 2004.
“E ndjeva dashurinë në stadiumin ku linda, në stadiumin ku u rrita”, tha Ochoa. “Më erdhi ndërmend kur isha në tribuna dhe thashë ‘Dua të jem në fushë dhe dua të luajë këtu në këtë stadium’”.
Ochoa e gdhendi emrin e tij përkrah legjendave të Kupës së Botës, Cristiano Ronaldo dhe Lionel Messi, të mërkurën – megjithëse me një yll. Ndërsa ky turne shënon paraqitjen e tij të gjashtë në turne të ndryshëm të Kupës së Botës, është vetëm e katërta që përfshin paraqitje në fushë.
Ochoa e përcolli ndeshjen nga stoli në Botërorin “Gjermania 2006” dhe “Afrika e Jugut 2010”, përpara se të bëhej portieri i padiskutueshëm i Meksikës nga “Brazili 2014” deri në “Katari 2022”.
Portieri i njohur si Memo u bë i njohur pas një paraqitje në barazimin 0:0 me Brazilin vendas në Kupën e Botës 2014, përfshirë një pritje të një goditjeje me kokë të Neymarit që i dha atij vlerësim ndërkombëtar. Ai e pasoi atë paraqitje me një paraqitje po aq mahnitëse në 1/16 e finales kundër Holandës, duke fituar edhe një herë çmimin e lojtarit të ndeshjes.
Ai gjithashtu pati një paraqitje të mirë në turneun e vitit 2018, duke përfshirë një ndeshje pa pësuar gol kundër kampiones në fuqi, Gjermanisë. Më pas, pavarësisht se e nisi mirë turneun e vitit 2022 me një paraqitje si lojtari i ndeshjes kundër Polonisë, Ochoa pësoi një gol në fund të ndeshjes kundër Arabisë Saudite për të vulosur eliminimin e parë të Meksikës nga faza e grupeve që nga viti 1978.
Prania e Ochoas në Kupën e Botës për herë të gjashtë ishte në rrezik derisa një dëmtim i titullarit të parashikuar Luis Angel Malagon, i cili kishte udhëhequr triumfin e Meksikës në Ligën e Kombeve dhe Kupën e Artë vitin e kaluar, hapi rrugën drejt kësaj gare të fundit. Dhe çfarë shfaqjeje ishte.
“Nëse do të më kishin kërkuar të bëja një skenar disa vite më parë, nuk mendoj se do të kishte dalë më mirë se sonte”, tha Ochoa. “Ishte e mrekullueshme. Ishte e përkryer”.
Ai hyri nën brohoritjet e më shumë se 85 mijë shikuesve në “Azteka”. Brohoritjet u bën edhe më të zhurmshme kur ai pati prekjen e parë.
Pas fishkëllimës së fundit, shokët e ekipit të Ochoas e hodhën atë në ajër në shenjë festimi.
“Në fund të fundit, mendoj se kjo është gjëja më e bukur nga të gjitha”, tha Ochoa. “Dashuria e shokëve të mi të ekipit”.
