Bari ka mbirë mbi kocka.
E pluhuri ka mbuluar dritaret.
Një e projektuar si mensë e tjetra konvikt.
Por studentët e Universitetit të Mitrovicës, as nuk bënë gjumë e as nuk u ushqyen në to.
Nga Universiteti i Mitrovicës thonë se vetë s’mund t’ia dalin e ta mobilojnë.
Andaj presin ndihmë nga Ministria e Arsimit.
“Konviktet edhe mensa janë të përfunduara si objekte, ato janë të gatshme mirëpo ne presim mbështetje nga Ministria që t’i mbushim me inventar dhe t’i bëjmë funksionale për studentë”, thotë Ahmet Jashari, drejtor i Zyrës për Informim në UMIB.
Kostoja që këta thonë se i nevojitet Universitetit për t’i funksionalizuar objektet, kap vlerën e 1 milion eurove.
Megjithatë nga Ministria e Arsimit kanë paraparë që fondet të jepen gradualisht.
“Ministria e Arsimit dhe Shkencës ka planifikuar projektin e inventarizimit dhe pajisjeve në menzën dhe konviktin e Universitetit “Isa Boletini” në Mitrovicë në kuadër të Ligjit të Buxhetit të vitit 2026. Vlera e mjeteve është përcaktuar sipas kërkesës nga universiteti për dy vite, respektivisht 250,000 € në vitin 2026 dhe 185,000 € në vitin 2027”, thuhet nga Ministria e Arsimit.
E kurdo që janë gati, hapësirë ka për një numër goxha të lartë studentësh.
“Konvikti ka hapësirë për 279 studentë derisa në mensë në të njëjtën kohë mund të ushqehen deri në 500 studentë”, thotë Jashari.
Në Universitetin “Isa Boletini” në Mitrovicë janë afër 1 mijë e 400 studentë që ndjekin studimet e larta në 6 fakultete.
