Ka kaluar 69.34 për qind e numërimit të votave për kandidatët për deputetë në nivel vendi, ndërsa rezultatet preliminare po japin një pasqyrë gjithnjë e më të qartë të kandidatëve më të votuar në secilin subjekt politik.
Sipas të dhënave të publikuara nga Komisioni Qendror i Zgjedhjeve (KQZ), kryetari i Lëvizjes Vetëvendosje, Albin Kurti, vazhdon të kryesojë bindshëm listën e kandidatëve më të votuar në vend me 165,095 vota.
Pas tij në radhët e LVV-së renditen Glauk Konjufca me 129,614 vota, Albulena Haxhiu me 75,177 vota, Hekuran Murati me 65,257 vota, Donika Gërvalla-Schwarz me 61,083 vota dhe Xhelal Sveçla me 49,275 vota.
Në Partinë Demokratike të Kosovës, kandidati më i votuar mbetet Bedri Hamza me 81,633 vota. Pas tij vijnë Përparim Gruda me 50,809 vota, Arian Tahiri me 44,198 vota, Uran Ismaili me 39,578 vota, Sala Jashari me 27,517 vota dhe Vlora Çitaku me 27,280 vota.
Ndërkohë, në Lidhjen Demokratike të Kosovës prin Vjosa Osmani Sadriu me 54,333 vota, e ndjekur nga Lumir Abdixhiku me 49,205 vota. Në mesin e kandidatëve më të votuar të LDK-së janë edhe Doarsa Kica-Xhelili me 38,042 vota, Hykmete Bajrami me 29,957 vota, Avdullah Hoti me 27,458 vota dhe Ukë Rugova me 23,113 vota.
Edhe në Aleancën për Ardhmërinë e Kosovës gara për votat preferenciale po vazhdon, me Ardian Gjinin që prin me 28,616 vota. Pas tij renditen Ramush Haradinaj me 25,742 vota, Daut Haradinaj me 19,662 vota, Besnik Tahiri me 16,965 vota, Bekë Berisha me 13,850 vota dhe Burim Ramadani me 12,438 vota.
Procesi i numërimit të votave për kandidatët për deputetë është ende në zhvillim e sipër dhe rezultatet mbeten preliminare deri në përfundimin e plotë të numërimit dhe përfshirjen e të gjitha kategorive të votave.
Me afro 70 për qind të votave të numëruara, Albin Kurti po shfaqet si kandidati më i votuar në nivel vendi, duke krijuar një epërsi të konsiderueshme ndaj kandidatëve të tjerë në garë.
