Qeveria e Kosovës ende nuk ka një qëndrim zyrtar për tërheqjen e vendimit për ndalimin e mallrave serbe në Kosovë. Nga Qeveria thonë se po punojnë dhe janë të angazhuar që Procesi i Berlinit të jetë i suksesshëm, derisa nga Serbia thonë se ka shanse që Prishtina të tërhiqet nga ky vendim për shkak të presionit ndërkombëtar.
Për arsye sigurie, nga 14 qershori, Qeveria përmes një vendimi ndaloi hyrjen e mallrave serbe në Republikë.
Në javët e fundit, Gjermania po kërkon vazhdimisht nga Kosova që kjo masë të largohet.
Përndryshe, gjasat janë që vendi të përjashtohet nga Procesi i Berlinit.
Nga Qeveria e Kosovës ende nuk ka një qëndrim zyrtar se a do të largohet ky ndalim.
“Po punojmë dhe jemi të angazhuar që 10-vjetori i Procesit të Berlinit të jetë i suksesshëm”, thuhet në njoftimin e Qeverisë
Por, kryeministri i Serbisë, Millosh Vucevic po e pret heqjen e masave ndaluese dhe lejimin e hyrjes së mallrave serbe.
“Ka disa aludime se ndoshta Prishtina mund të tërhiqet, pra të pranojë hyrjen e mallrave serbe në Kosovë. Gjermanët tani po e promovojnë shumë përmes marrëveshjes së re CEFTA, e cila kërkon shumë takt dhe mençuri tonë. Do të shohim nëse kjo do të ndodhë në prag të 10-vjetorit të procesit të Berlinit që do të arrihet”, ka thënë Vucevic.
Njohësi i zhvillimeve politike, Albinot Maloku thotë se ruajtja e pozicionit të Kosovës brenda CEFTA-s duhet të jetë prioritet i ekzekutivit.
Samiti i dhjetë i Procesit të Berlinit do të mbahet më 14 tetor.
