Një vajzë me probleme mendore dyshohet se është dhunuar në Pejë.
Lidhur me këtë, zëdhënësi i Prokurorisë Themelore të Pejës, Shkodran Nikçi, për teve1.info tha se janë duke ndërmarrë veprime hetimore për identifikimin dhe arrestimin e personit apo personave të dyshuar.
“Pas veprimeve hetimore dhe ekzaminimit mjekësor të viktimës, dyshohet se është dhunuar. Për këtë çështje janë autorizuar nga Prokurori i Shtetit, Policia e Kosovës për të ndërmarrë veprime hetimore për identifikimin dhe arrestimin e personit apo personave të dyshuar, që e kanë kryer këtë vepër penale”, tha Nikçi.
Viktima 23-vjeçare dyshohet se është shfrytëzuar dhe dhunuar nga persona akoma të paidentifikuar.
Ndërkohë, Policia e Kosovës në raportin ditor ka bërë të ditur se viktima është shtetase e Shqipërisë, ku e njëjta ishte raportuar si person i zhdukur.
“Nga njësitë policore në Pejë është gjetur viktima femër shtetase e Shqipërisë e cila ishte raportuar në policinë e shtetit të Shqipërisë si person i zhdukur. Lidhur me rastin e njëjta është dërguar në emergjencë për kontrollë mjekësore, ndërsa nën dyshimin se ndaj të njëjtës është kryer vepra e lartcekur me urdhër të prokurorit viktima është dërguar për ekzaminim në IML. Rasti është duke u hetuar”, thuhet në njoftim./teve1.info/
