Gjykata Themelore në Gjakovë ka aprovuar kërkesën e Prokurorisë Themelore, duke i caktuar masën e paraburgimit prej një muaji të pandehurit me inicialet M.S., i dyshuar për sulm seksual ndaj vajzës së tij të mitur.
Sipas njoftimit zyrtar, i pandehuri dyshohet se më 1 prill 2026 ka vepruar në mënyrë të papërshtatshme dhe pa pëlqimin e të miturës, duke përdorur përmbajtje të papërshtatshme dhe duke bërë kërkesa të papranueshme.
Rasti është raportuar në polici pasi e mitura ka njoftuar prindin tjetër lidhur me incidentin.
Gjykata ka bërë të ditur se, për shkak të ndjeshmërisë së rastit dhe për të mbrojtur privatësinë dhe dinjitetin e personave të përfshirë, veçanërisht të të miturës, detajet janë kufizuar.
“Gjyqtari i procedurës paraprake, Drilon Haraçia, pas mbajtjes së seancës dëgjimore ka vlerësuar se janë përmbushur kushtet ligjore për caktimin e masës së paraburgimit ndaj të pandehurit. Me këtë vendim, i pandehurit M. S., do të mbahet në paraburgim në kohëzgjatje prej një (1) muaji, periudhë kjo që do të llogaritet nga data e arrestimit me 07 prill 2026 deri më 06 maj 2026. Palët kanë të drejtë ankese ndaj këtij vendimi në Gjykatën e Apelit të Kosovës”, thuhet në fund të njoftimit./teve1.info/
