Gjykata Themelore në Prizren, ka caktuar një muaj paraburgim për Sh.O i dyshuar për vrasjen e 27-vjeçarit në Kobaj të Prizrenit të dielën.
Paraburgim prej një muaj i është caktuar dhe A.O nëna e dy të dyshuarve, për nxitje të vrasjes.
“I pandehuri Sh. O. dhe i mituri A:O.,, më datë 14.06.2026, në fshatin Kobaj, Komuna e Prizrenit, në bashkëkryerje dhe me dashje privojnë nga jeta viktimën A.O. dhe me atë rast vënë në rrezik jetën e të dëmtuarit I.O., të shtyrë nga e dyshuara A.O. – nëna të pandehurve, në atë mënyrë që pas një konflikti të mëhershëm të lindur nga mosmarrëveshjet, fillimisht përfshihen në një konflikt verbal e më pas fizik me viktimat A.O. dhe I.O., të cilët përdorin mjete të mprehta – thika, i sulmojnë dhe i godasin ata. Si pasojë e goditjeve të marra me thikë në pjesën e gjoksit, viktima A.O. ndërron jetë, ndërsa i dëmtuari I.O. pëson lëndime të rënda trupore, të rrezikshme për jetën, për çka është dërguar për trajtim mjekësor në Spitalin Rajonal të Prizrenit”, thuhet në komunikatë.
Gjykata Themelore në Prizren departamenti për të mitur i ka caktuar masën e paraburgimit për një muaj edhe të dyshuarit tjetër i mitur.
