Sot shënohet një dekadë nga dita kur Kuvendi i Kosovës miratoi Projektligjin për Marrëveshjen e Stabilizim-Asociimit (MSA) ndërmjet Kosovës dhe Bashkimit Evropian.
Në seancën e 2 nëntorit 2015, nga 87 deputetë të pranishëm, 86 votuan pro ratifikimit të marrëveshjes, ndërsa opozita lëshoi sallën në shenjë pakënaqësie politike.
Ratifikimi i MSA-së u bë në një seancë solemne, ku të pranishëm ishin edhe ish-presidentja e Kosovës, Atifete Jahjaga dhe një numër i madh i ambasadorëve në Prishtinë të vendeve më të industrializuara.
Vetë Marrëveshja e Stabilizim-Asociimit ishte nënshkruar më 27 tetor 2015 në Strasburg, duke i dhënë fund negociatave që kishin nisur në tetor të vitit 2013.
Ky nënshkrim shënoi vendosjen e marrëdhënieve kontraktuale mes Kosovës dhe BE-së, një hap i parë drejt afrimit të plotë institucional me Unionin Evropian.
Në korrik të vitit 2014, Kosova dhe Komisioni Evropian hodhën inicialet e tyre në marrëveshjen e Stabilizim Asociimit, që paraqet hapin e parë zyrtar drejt anëtarësimit të plotë në BE.
