Ka filluar seanca konstituive e Kuvendit të Kosovës e ndërprerë më 15 prill pas dështimit të miratimit të raportit për vlerësimin e mandatit të deputetëve.
Seanca nga kryesuesi, Avni Dehari është thirrur për sot pas marrjes së përgjigjes nga presidentja Osmani, prej së cilës kishte kërkuar interpretim se si duhet të veprohet, pas asaj që ndodhi të martën.
Në letrën drejtuar kryesuesit Dehari, Osmani ka potencuar se Kushtetuta e Republikës dhe praktika gjyqësore e Gjykatës Kushtetuese kërkojnë interpretim që e mundëson, e jo që e pengon, themelimin dhe funksionimin kushtetues të institucioneve.
Osmani përmes letrës ka kërkuar që seanca të vazhdojë brenda 48 orëve pas ndërprerjes – ashtu siç parashihet në Rregulloren e Kuvendit.
“Në këtë rast konkret, ky është obligim juaj si kryesues i seancës themeluese, si dhe i të gjithë deputetëve të zgjedhur në mandatin e nëntë legjislativ të Kuvendit. Prandaj, ju kujtoj gjithashtu se fryma e Kushtetutës, jurisprudenca e Gjykatës Kushtetuese dhe Rregullorja e Punës së Kuvendit të Kosovës ju detyron që të rifilloni miratimin e Kushtetutës”, thuhej në letrën e Presidentes.
Partia që aktualisht udhëheq qeverinë në detyrë, Lëvizja Vetëvendosje është shprehur e bindur se i ka numrat për seancën konstituive, ku po përballet me kundërshtimet e partive opozitare të legjislaturës së 8-të, se anëtarët e qeverisë që janë zgjedhur deputet duhet të japin dorëheqje.
Donika Gërvalla, ministre në detyrë e Punëve të Jashtme ka thënë në Tëvë 1 se si kabinet qeveritar kanë dorëzuar dorëheqjen dhe tani janë në duke ushtruar detyrën, por ka theksuar se institucionet nuk mund të lihen pa përgjegjës.
Partitë opozitare nuk kanë dhënë sinjale se kanë ndryshuar qëndrim, sa i përket kërkesës për dorëheqje nga Kurti dhe ministrat tjerë të zgjedhur deputet.
Kryetari i LDK-së, Lumir Abdixhiku të mërkurën tha se në seancë do të kërkojnë sërish dorëheqjen e kabinetit qeveritar
As nga PDK e AAK nuk kanë shprehur qëndrime ndryshe nga ato që kishin të martën.
Ndryshe, miratimi i raportit të Komisionit për verifikimin e mandateve dhe kuorumit do t’i hapte rrugë betimit të deputetëve, më pas zgjedhjes së kryetarit dhe nënkryetarëve të Kuvendit.
Vetëm pas kalimit të të gjitha këtyre hapave, legjislatura e nëntë e Kuvendit të Kosovës do të konsiderohej e konstituuar.
E pas konstituimit të Kuvendit, do të hapej rruga për formimin e Qeverisë së re të Kosovës.
