Për shkak të kushteve të rënda atmosferike dhe reshjeve të vazhdueshme që kanë shkaktuar përmbytje dhe dëme të konsiderueshme në infrastrukturë, disa komuna në Kosovë kanë vendosur të mos e nisin sipas planit gjysmëvjetorin e dytë të vitit shkollor 2025/2026.
Komuna e Malishevës, Drenasit dhe Fushë Kosovës ka marrë vendim për shtyrjen e fillimit të mësimit, me qëllim garantimin e sigurisë së nxënësve dhe stafit arsimor.
Nga Komuna e Malishevës është bërë e ditur se procesi mësimor do të vazhdojë më 14 janar 2026, pasi reshjet e shumta dhe përmbytjet kanë dëmtuar rrugët dhe kanë penguar qarkullimin normal.
Autoritetet lokale kanë theksuar se vendimi është marrë pas vlerësimit të situatës në terren dhe në interes të sigurisë publike.
Edhe komunat e tjera të prekura pritet të njoftojnë për datat e reja të rifillimit të mësimit, në varësi të përmirësimit të kushteve atmosferike dhe sanimit të dëmeve. /teve1.info/
