Ka nisur protesta e 13-të në sheshin “Skënderbeu” në Prishtinë, kundër vendimit të Gjykatës Speciale në Hagë ndaj ish-krerëve të Ushtrisë Çlirimtare të Kosovës (UÇK).
Protestuesit janë mbledhur në shesh, ndërsa gjatë mbrëmjes janë paraparë një sërë aktivitetesh dhe fjalimesh.
Programi do të hapet me “Betimin e Ushtarit”, të cilin do ta bëjë veterani i UÇK-së, Bekim Juniku.
Ai pritet të ndajë më pas edhe dëshminë e tij personale.
Të pranishmëve do t’u drejtohen organizatori i protestës, Çlirim Haziri, gazetarja nga Shqipëria, Denada Kola, si dhe aktori Kushtrim Sheremeti.
Gjatë protestës, në ekranin LED do të shfaqet videoja “Rrëfimi i ushtarit”, ndërsa Luan Jahiri do të interpretojë një pjesë kushtuar Epopesë së Jezercit, si dhe një këngë ushtarake.
Në përmbyllje të programit është paralajmëruar edhe aksioni simbolik “Një minutë heshtje për drejtësinë”.
Ndryshe, protesta e sotme në sheshin “Skënderbeu” në Prishtinë vjen pas miratimit të Deklaratës së Kuvendit të Kosovës lidhur me aktgjykimin e Gjykatës Speciale në Hagë ndaj katër ish-krerëve të Ushtrisë Çlirimtare të Kosovës (UÇK).
Deklarata është miratuar me 99 vota për, ndërsa nuk pati vota kundër apo abstenime.
Në deklaratë, deputetët kanë shprehur qëndrimin se e konsiderojnë “të papranueshëm përfundimin për ekzistencën e një qëllimi të përbashkët kriminal” lidhur me katër ish-krerët e UÇK-së./teve1.info/
