Ka nisur dalja e qytetarëve për të votuar në qendrat e votimit në Mitrovicë të Veriut dhe Leposaviq, ndonëse deri tani interesimi është i vogël.
Gazetari i Tëvë 1 Shpat Blakçorri ka raportuar se nga Lagjja 7 shtatori tek vendi i njohur si “3 rrokaqiejtë” deri tani ka votuar vetëm një qytetar.
“Te Lagjja 7 shtatori përballë “3 rrokaqiejve” deri më tani ka votuar vetëm një person i cili ishte i nacionalitetit shqiptar dhe deri më tani nuk ka dalë askush tjetër. Ishte edhe një qytetar, Xhemajl Hasani i cili në këtë moment u largua, sepse nuk figuronte emri i tij në këtë qendër të votimit dhe do të votojë në Suhodoll. Është një numër jashtëzakonisht i vogël i qytetarëve deri më tani të cilët kanë vendosur për të votuar”, ka shtuar gazetari i Tëvë1.
Teksa në një qendër të votimit në hyrje të Leposaviqit kanë dalur për të votuar deri pak më parë, vetëm tre qytetarë.
Kështu ka raportuar nga terreni gazetari Fidan Zejnullahu.
Mitrovica e Veriut është komunë në të cilën kanë të drejtë vote 18 mijë e 118 votues, të shpërndarë në pesë qendra të votimit. Kandidatët për këtë komunë janë Betim Osmani nga Iniciativa Qytetare Mitrovica, Taulant Kelmendi nga Partia Demokratike e Kosovës, dhe Erden Atiq nga Lëvizja Vetëvendosje.
Në komunën e Leposaviqit të drejtë vote kanë 13 mijë e 318 votues, të shpërndarë në pesë qendra të votimit, ku kandidatë janë Albulena Behluli-Hetemi nga PDK dhe Lulzim Hetemi nga LVV.
