Rrugën të cilën e kishin nisur Ramadan Elezi, Muhamet Hasani e Shefket Dullovi në mars të vitit 1999, iu ndërpre nga forcat serbe.
Tre të rinjtë e fshatit Kaçanik i Vjetër u kapën nga fqinjët e tyre serbë të cilët nuk i lanë të bashkoheshin me familjarët e tyre, që për shkak të luftës ishin zhvendosur në mal.
Ata u rrahën, u maltretuan, e më pas Elezi e Hasani u vranë nga forcat serbe, kurse Dullovi arrinte t’iu ikte nga duart .
Në vendin ku dy vëllezërit e tyre u keqtrajtuan, Milaim Elezi e Sahit Hasani erdhën pas 26 vitesh për ta kujtuar dhe rrëfyer ngjarjen.
“Dëshmitari i gjallë, Shefket Dullovi, ai ka ardhur maleve tek ne aty ku kemi qenë duke qëndruar edhe na ka treguar. Edhe ai ishte i rrahuar i malltretuar, kish pas shenja gjaku. Edhe qaty për qaty e kemi marrë veshë që atë e kanë kapur”, ka thënë Elezi.
Kurse Ramdani arriti që vëllaun e tij 21 vjeçar të varroste me disa bashkëfshatar.
“Të nesërit në mëngjes e kam marrë vesh se janë të vrarë prej disa bashkëfshatarëve të cilët nuk e dinin as ata saktë. Vëllai tem e kam gjetur të vdekur, e pastaj e kam varrosur dhe pas luftës e kam tërhequr në fshatin tonë”, ka thënë Hasani.
Të përfshirë në vrasjen e dy të rinjve dyshohet të ishin Veslin Tomiq, dhe Joviça Janiçijoviq të cilët ishin bashkëfshatarë të tyre.
“Si figura i kemi njohur kurrë te keq nuk kemi pas me ta, e keq ka qenë veç pse kemi qenë shqiptar edhe njëri nga serbëve që kemi pas fqinj të parë ia vranë babën tu vjedhë orendi shtëpiake edhe ky dëshironte të bëjë hakmarrje. Edhe dy serbë të tjerë e kanë pyetur këtë se si me vepru dhe kanë vepru si kanë vepru…”, ka thënë tutje Hasani.
E të hënën, pas afër 3 dekadave, Prokuroria Speciale ka ngritur aktakuzë në mungesë ndaj dy personave të dyshuar.
Të dy vëllëzrit e konsiderojnë të vonuar ngritjen aktakuzës, por presin që të akuzuarit të vuajnë dënimin.
“Lajmin e pritëm jashtëzakonisht mirë por pak i vonuar se kjo punë është dashtë mu kry shumë më herët edhe drejtësia është dashur të fillojë më kohë, por apët vonë nuk bëhet kurrë”, ka thënë Elezi.
“Unë nuk e pasna dëgju, por ishalla drejtësia shkon në vend se unë as nuk pasna dëgju që është ngrit aktakuzë ndaj këtyre personave. Para tre muajve kanë qenë prokurorët kemi qene në Kaçanik kemi dhënë deklarata”, ka thënë Hasani.
Prokuroria Speciale, i ka propozuar Gjykatës Themelore në Prishtinë që të mbajë gjykimin në mungesë, për shkak se të pandehurit J.J dhe V.T janë të paarritshëm për organet e drejtësisë.
