Medalistja e artë olimpike e Kosovës në “Tokio 2020” ka lënë pas karrierën si garuese dhe tani po ndërton rrugëtimin e saj të ri si trajnere në Federatën e Xhudos së Belgjikës.
Debutimi i saj si trajnere erdhi në Kampionatin Evropian në Podgoricë për Juniorë, ku ajo po dy xhudiste të reja, në kategoritë -48 kg dhe -70 kg.
Në një intervistë për faqen zyrtare të Federatës Evropiane të Xhudos (EJU), Gjakova ka folur për aventurën e re, sfidat në një vend tjetër dhe misioni i ri si trajnere.
Në Belgjikë, Gjakova punon në pjesën frankofone të vendit, në bashkëpunim me trajnerin brazilian Pedro Guedes.
“Është një botë tjetër, por objektivi mbetet i njëjtë: xhudoja. Të kesh këtë pikë të përbashkët është sikur të kesh një gjuhë të përbashkët. Duke ardhur nga sporti elitar, e kuptoj presionin, stilin e jetës dhe gjithçka që këta sportistë përjetojnë çdo ditë.”
Për një kampione olimpike, kalimi nga roli i sportistes në atë të trajneres sjell një përgjegjësi krejt tjetër. Nuk është më vetëm performanca personale ajo që varet nga vendimet e saj, por edhe zhvillimi i sportisteve të reja.
Dhe në këtë proces, Gjakova po mbështetet në përvojën që e ndërtoi gjatë më shumë se dy dekadave në Kosovë.
Pas Gjakovës qëndron një histori e gjatë bashkëpunimi me trajnerin legjendar të Kosovës, Driton “Toni” Kuka.
“Mbështetem në atë që di më së miri. Sistemi që ndërtuam me Tonin solli pesë medalje olimpike. Natyrisht, në Belgjikë duhet të përshtatem me mentalitete të ndryshme, por baza teknike mbetet e njëjtë”, thekson ajo.
“Jam në kontakt të vazhdueshëm me Tonin. Para se ta pranoja këtë punë, kërkova këshillën e tij dhe mora bekimin e plotë. Mbështetja e tij në këtë kapitull të ri do të thotë shumë për mua.”
