Gjendja e dy të miturve të lënduar pas goditjes nga rryma elektrike në shkollën “Faik Konica” në Prishtinë është serioze.
Ejup Govori, mjeku kujdestar në Klinikën Emergjente të Qendrës Klinike Universitare të Kosovës (QKUK) bëri të ditur për teve1.info se të lënduarit janë të moshës 15-vjeçare.
Gojori theksoi se dy të miturit kanë marrë djegie të shkallës së rëndë në pjesë të trupit.
“Gjendja e tyre është për momentin stabile, mirëpo lëndimet janë jashtëzakonisht serioze. Meqenëse kontakti me rrymë sigurisht ka qenë i lartë, çka ka shkaktu djegie të shkallës së rëndë të pjesëve të trupit”, deklaroi ai për teve1.info
Teksa, Malë Gashi, ndihmëskomandant i zjarrfikësve në Prishtinë potencoi se sipas informatave, të lënduarit nuk kanë qenë nxënës të shkollës.
“Sot, në ora 10:40, kemi pranuar informatë për zjarr në trafo dhe për persona të lënduar, në oborrin e shkollës ‘Faik Konica’. Ekipet e zjarrfikjes menjëherë kanë dalë në vendin e ngjarjes, nuk ka pasur zjarr. Në kontakt me PK dhe ekipet mjekëspre, jemi njoftuar se dy persona janë të lënduar nga rryma. Sipas informatave, nuk kanë qenë nxënës të shkollës. Ekipi mjekësor i ka dërguar në trajtim. Për neve nuk kishte nevojë të intervenojmë”, është shprehur ai për teve1.info
https://teve1.info/lajmet/dy-te-mitur-te-lenduar-pas-goditjes-nga-rryma-ne-shkollen-faik-konica-ne-prishtine/
