Ambasada e Republikës së Kosovës në Austri, njofton se që nga data 1 shtator 2021, ka hyrë në fuqi kalimi nëpër Austri me patentë shofer të Republikës së Kosovës.
Përmes një postimi në Facebook, njëherit kanë bërë të ditur se cilat kategori do të përfitojnë nga ky lehtësim, derisa kanë shtuar që e njëjta nuk do të vlejë për ata qytetarë të Kosovës, të cilët në Austri kanë qëndrim të rregullt, raporton teve1.info.
“Ambasada e Republikës së Kosovës në Austri njofton se që nga data 1 shtator 2023, pas ndryshimit të Ligjit Federal të Austrisë dhe aktit respektiv normativ lejohet kalimi nëpër Austri me patentë shofer të Republikës së Kosovës. Nga ky lehtësim përfitojnë këto kategori: Qytetarët e Kosovës që në Austri ndodhen si vizitorë, qytetarët e Kosovës që nëpër Austri kalojnë transit, qytetarët e Kosovës që kanë qëndrim të përkohshëm në Austri. Ky lehtësim nuk vlen ende për të gjithë ata qytetarë të Kosovës, të cilët në Austri kanë qëndrimin e tyre të rregullt me leje qëndrimi”, thuhet në postimin e tyre.
Më tej, kanë shkruar se Ambasada e Republikës së Kosovës në Austri dhe institucionet e Republikës së Kosovës do të vazhdojnë angazhimin e tyre intensiv për njohjen e plotë të patentë shoferëve, e cila do të lehtësojë konvertimin dhe zëvendësimin e plotë të lejes së patentave për qytetarët e Republikës së Kosovës me leje qëndrimi afatgjatë në Austri./teve1.info/.
Kujtojmë që në shkurt të këtij viti, Ministri i Punëve të Brendshme të Kosovës, Xhelal Sveçla, pati deklaruar se ka marrë aprovimin nga Qeveria e Kosovës, për tu arritur marrëveshje për njohjen e patentë shoferëve të Kosovës nga Austria.
“Marrëveshja sipas legjislacionit në Republikën Federale të Gjermanisë ka marrë aprovimin e të gjitha landeve dhe patent shoferët do të njihen në tërë Gjermaninë. Të dashur qytetarë që jetoni kudo në diasporë, Lehtësimi i jetës dhe veprimtarisë suaj është përgjegjësi e jona në bashkëpunim me shtetet aleate ku ju jetoni. Në të gjitha takimet me homologët e mi kam ngritur këtë dhe çështje të tjera për ju. Këtë javë ne kemi marrë aprovimin e Qeverisë sonë për nismat e marrëveshjeve të tilla edhe me Turqinë e Kanadanë dhe jemi në proces me Italinë e Austrinë dhe natyrisht do të njoftoheni me të gjitha proceset që do të nisim apo finalizojmë”, ka thënë Sveçla.
Derisa më 6 prill të vitit 2022, Sveçla pati bërë të ditur se ka nënshkruar zyrtarisht marrëveshjen për njohjen reciproke të patentë shoferëve me Republikën Federale të Gjermanisë.
