Ministri i Financave, Hekuran Murati dhe kryeshefi Ekzekutiv i Termokosit Fisnik Osmani kanë nënshkruar tri marrëveshje për ndërtimin e ngrohtores diellore në Prishtinë.
Në komunikatë për media është bërë e ditur se ndërtimi i ngrohtores diellore e cila do t’i shërbejë qytetarëve të Prishtinës është bërë e mundur përmes marrëveshjes me BERZH me vlerë 23.2 milionë euro, nga KfW 31.6 milionë euro, nga BE grant 21.5 milionë euro dhe kontributi nga Qeveria 4.4 milionë euro.
“Ky projekt parasheh ndërtimin e një impianti të ngrohjes solare në Prishtinë ku përmes saj do të zgjerohen kapacitetet e prodhimit të energjisë termike të Termokosit deri në 50 MW. Pra, 38 mijë qytetarë që aktualisht nuk janë pjesë e rrjetit të ngrohjes do të fillojnë të kenë qasje në shërbimet e Termokosit pas përfundimit të projektit”, thuhet në komunikatë.
Lidhur me këtë, Murati shprehu se “ngrohtorja e cila do të ndërtohet është investimi më i madh në rajon sa i përket prodhimit të energjisë termike nga energjia diellore. Ky projekt mundëson që më shumë qytetarë të kenë ngrohje në shtëpitë e tyre me çmim më të volitshëm dhe në të njëjtën kohë ndikon në përmirësimin e cilësisë së ajrit”.
Ndërkohë, ambasadori i Gjermanisë në Kosovë falënderoi ministrin Murati për bashkëpunimin e deritanishëm duke shprehur se “ngrohtorja diellore e qytetit ofron kapacitet të shtuar të ngrohjes dhe se ndërtimi i ngrohtores bëhet pikërisht në një kohë vendimtare për tranzicionin e gjelbër energjetik në Kosovë”.
Përfaqësuesi i BERZH-it, Sergiy Maslichenko theksoi se “ky projekt do të lidhë më shumë ndërtesa me ngrohtoren e qytetit dhe se është shembulli më i mirë i bashkëpunimit në mes akterëve të ndryshëm”.
Në anën e tij, përfaqësuesi i BE-së tha “me një investim prej 80 milionë euro nga EU, BERZH, KfW, dhe institucionet e Kosovës, ky projekt ndryshon paradigmën e prodhimit të energjisë në Kosovë pasi po bëjmë një ndryshim të rëndësishëm drejt energjisë më të pastër dhe të volitshme për të gjithë qytetarët”.
Në ceremoninë e nënshkrimit ishin prezent edhe ambasadori Gjerman në Kosovë Rohde, drejtori në Bankën për Rindërtim dhe Zhvillim (BERZH) Maslichenko, shefi për Bashkëpunim në Zyrën e BE-së në Kosovë Madsen, kryetari i Komunës së Prishtinës Edi Rama./teve1.info/
