Është kjo letra e Gonxhe Bojaxhiut – Nënë Terezës, drejtuar presidentit të Shqipërisë, Ramiz Alia, në gushtin e vitit 1989.
Përmes saj, Nënë Tereza, i kërkoi ta lejonte të hynte në Shqipëri.
“Zemra jame ka ni dishir t’madhe me ardh n’Shqipëri me motrat e mija e me prue ket dashni dhe kete pagje. Unë kam pa qi ju keni t’gjith punt shum mir – por zemra jem dishron shum me ardh me motrat e mija me dhan ket dashni”, thuhet ndër të tjera në Letrën e Nënë Terezës.
E pikërisht figura e Nënë Terezës, në Prishtinë bëri bashkë dy kryeshefet e arkivave shtetërore.
Bedri Zyberaj kryeshef në Arkivin Shtetëror të Kosovës, priti të hënën atë të Maqedonisë së Veriut, Emil Kerteski.
Të dy hapën një ekspozitë, për nder të 25 vjetorit të vdekjes së Nënë Terezës.
“Është një e rëndësie të veçantë, sepse arkivi i Maqedonisë së Veriut është I vetmi arkiv që ka dokumente të fëmijërisë së Gonxhe Bojaxhiut – Nënë Terezës”, tha Zyberaj.
Ky dokumentacion i arkivit të Nënë Terezës, tani gjendet edhe në Arkivin Shtetëror të Kosovës.
Kjo pasi Arkivi i Maqedonisë së Veriut në mënyrë të digjitalizuar, të hënën ia dhuroi atij të Kosovës.
E fjalë të mëdha për Nënë Terezën, kishte edhe kreu i Arkivit të Maqedonisë së Veriut, Emil Krteski.
“E kemi përgatitur këtë ekspozitë, sepse Nënë Tereza është një person shumë i rëndësishëm në të gjithë botën. Ajo ka lindur dhe ka jetuar për 18 vjet në Shkup, pastaj ka shkuar në Britani të Madhe e më pastaj në Indi, për t’i ndihmuar njerëzit e varfër. Po ashtu Nënë Tereza ka origjinë edhe nga Prizreni”, tha Kretski, kryeshef në Arkivin e Maqedonisë së Veriut.
Në këtë ekspozitë, u publikuan për herë të parë edhe disa fotografi dhe dokumente që i përkasin fëmijërisë së Gonxhe Bojaxhiut.
“Ky dokument është dokumenti me të cilin Nënë Tereza ka bërë kërkesë për nxjerrjen e pasaportës në vitin 1928 për të shkuar në Angli, për shkollim”, deklaroi Muzafer Bislimi, zëvendësdrejtor në Arkivin e Maqedonisë së Veriut.
E pranishme në këtë ekspozitë, ishte edhe ambasadorja e Maqedonisë së Veriut në Kosovë, Shpresa Jusufi.
Kronika e gazetarit Fidan Zejnullahu.
