Vogëlushi në foto është Avni Veseli, një nga tre fëmijët shqiptarë që u mbytën në Lumin Ibër të Mitrovicës para 21 vitesh si shkak i ndjekjes nga disa burra të nacionalitetit serb.
Mall për Avniun ka çdo ditë e ëma.
Por dhimbja i shtohet asaj secilin përvjetor të tragjedisë që s’gjeti ende drejtësi.
Kjo nënë, e ka të freskët bisedën e fundit më djalin 11 vjeçar që e bëri më 16 mars të vitit 2004.
“U kanë në shkollë, u ardh prej shkollës ishte në klasë të pestë u ardh e ka lanë çantën. Më tha nënë merre çantën edhe dul, tha nënë, po dal po luaj me shokë. Thash rri djali jem lësho lopën, tha po du me dal me luajtur me shokë. As nuk i heq teshat e shkollës se gjithë i heqke e as nuk hëngër e doli e deri në 6 në mbrëmje s’kemi ditë sen për të. Kur hyn marsi me kanë sen, prej 1 mars e këndej më duket në dhe hi e se di e kaloj disi këtë mars, e them mos të vjen hiç për neve. Por nuk po kish njeriu se çfarë të bëjë”, ka deklaruar nëna e Avni Veselit, Abide Veseli.
Lajmin se i biri humbi jetën në lumin “Ibër” ishte tragjik për familjen Veseli.
“Nuk mundem me u pajtua deri sa të shkojë te ai, edhe për me zbuluar rastin kush ke shkaktar që na ndodhi kjo”, ajo më brengosë veç me ditë kush edhe me u dënuar me burg të përjetshëm. E mos me pa më as dritë e as diell”.
Bashkë me djalin e Abides ishte edhe Egzon Deliu, që humbi jetën në mënyrë tragjike marsin e vitit 2004.
Zaim Deliu, babai i 13 vjeçarit, thotë që të vegjlit ishin duke luajtur matanë Ibrit. Në atë vend ishte edhe një burrë i nacionalitet serb, i cili sipas Deliut i ka sharë e frikësuar fëmijët duke i ndjekur me qenë.
Më pastaj, disa serbët që ishin mbledhur, i kishin bllokuar gjitha rrugët fëmijëve.
Frika tek ta ishte rritur, e të vetmen zgjidhje të vegjlit Deliu, thotë se e patën hedhjen në lumin që kishte dal prej shtrati.
“Djemtë janë dalë andej lumit Ibër me luajt, me u merr me aktivitete të veta, e kemi një pjesë të tokës aty. Edhe aty ka qenë një serb duke e korr pak tall.00:39-01:48Këta kur janë shkuar aty ai i ka sha e i ka frikësuar, lart ka qenë një pjesë bash te kthesa në Zupq. E unë jam kanë me traktor ka erdha i pash që janë mbledh nuk e dija pse. Kish ndodh një vjedhje e lopëve e ishin mbledh aty. Prej asaj turme kur e kanë dëgjua zërin e serbit që ka fol me ta, janë vërsul teposhtë e ja kanë blloku rrugën. Lumi ka qenë shumë i madh jashtë mase është dal prej shtrati e i ka marr edhe arat. Edhe ata e kanë përjetuar luftën e din çka është kanë lufta, çka munden me bo edhe e kemi vendos, tregonte Fitimi i mbijetuari, tha thonin mu ndal vijnë e na mbysin ata që iu kanë vërsul nga të gjitha anët me qenë plus, me hi në lum mbytemi e kanë vendos me i ra lumit kanë qenë katër persona, Fitimi, Egzoni, Avniu edhe Florenti”, tha ai.
Nga lumi i gjallë doli vetëm Fitimi.
E momentet e fundit me Egzonin i mban mend edhe sot i ati.
“Unë isha duke e rregull një veturë, te një oborr i vëllait e ai me Avniun ishin ardh te shpija e kishin hëngër pak bukë e ishin nisë me shku me ndërru një gjel. Kishte merak me i ndërru gjelin, tek një kojshi edhe unë veç e kam shikuar nuk kam mundur t’i them kthehu se tash pe rregulloj veturën e dalim e vozisim, po veç e kam shikuar edhe ai u kanë momenti i fundit”.
Zaimi Deliu, humbi djalin që kishte pas 7 vajzave.
“Njeriu kur beson në Zot e ka më lehtë. Ne atë e patëm pas 7 vajzave, bile unë thosha me mujt e me pa një djalë e me vesh veshje kombëtare edhe me vdek zhig nuk më mbet”. E kështu djali më lindi mas një viti gruja, ia punoj do tirqi edhe e vesha domethënë ma flladiti zemrën. Mirëpo u deshtë me u pajtu se Zoti e ka fal e ai e ka marr”, ka deklaruar ai.
Vdekja e fëmijëve shqiptarë dyshohet qe erdhi nga dhuna e serbëve. Por shkaqet asnjëherë nuk u qartësuan.
Kjo ngjarje e trishtë, u bë shkas qe në marsin e vitit 2004 të nisin protestat masive që më vonë njihen si “Trazirat e Marsit” si revoltë e mbytjes së 3 fëmijëve.
Trazirat që shpërthyen zgjatën dy ditë, me ç’rast u vranë 19 civilë, prej të cilëve 11 shqiptarë dhe 8 serbë, ndërsa u lënduan mbi 900 persona, kryesisht shqiptarë.
